11234

کراچی سنٹرل جیل میں فری آئی کیمپ کا اہتمام کیا گیا

کراچی: الخدمت فاؤنڈیشن کراچی اور زیڈ ایم ٹی کلینک کے تعاون سے کراچی سنٹرل جیل میں قیدیوں کے لئے فری آئی کیمپ کا انعقاد کیا گیا۔ کیمپ میں 400

قیدیوں کا فری آئی چیک اپ کیا گیا جبکہ 279 قیدیوں کو چیک اپ کے ساتھ عینکیںبھی فراہم کی گئیں۔

25

الخدمت فاؤنڈیشن وومن ونگ کے زیر اہتمام مختلف جامعات سے الخدمت رضاکاران کے لئے ٹاؤن شپ کے مقامی سکول میں وولنٹیرز ٹریننگ ورکشاپ کا انعقاد

الخدمت فاؤنڈیشن وومن ونگ کے زیر اہتمام مختلف جامعات سے الخدمت رضاکاران کے لئے ٹاؤن شپ کے مقامی سکول میں وولنٹیرز ٹریننگ ورکشاپ کا انعقاد کیا گیا۔تقریب کی صدارت الخدمت فاؤنڈیشن پاکستان وومن ونگ کی صدر طلعت ظہیر نے کی جبکہ نائب صدر شہناز بقائی،جنرل سیکرٹری کلثوم رانجھا،اسسٹنٹ سیکرٹری شبنم شعیب اور نزہت رانا سمیت مختلف جامعات سے سینکڑوں الخدمت رضاکاران نے ورکشاپ میں شرکت کی۔ اس موقع پر نامور موٹیویشنل اسپیکر زبیر منصوری نے طالبات کو وولنٹیرازم کی اہمیت کے حوالے سے خصوصی لیکچر دیا اوربتایا کہ بحیثیت طالب علم ہم پر کیا ذمہ داریاں عائد ہوتی ہیں اور وہ کس طرح اپنے اپنے شعبے میں رہتے ہوئے خدمت خلق کی سرگرمیاں سرانجام دے سکتی ہیں۔ کلثوم رانجھا نے میڈیا سے گفتگو کرتے ہوئے بتایا کہ الخدمت فاؤنڈیشن پاکستان وومن ونگ مختلف شعبوں میں خدمت خلق کے ساتھ ساتھ نوجوان نسل میں وولنٹیرازم کے حوالے سے شعور اجاگر کرنے کے لئے بھی کوشاں ہے۔اس وقت الخدمت وومن ونگ کے ساتھ مختلف جامعات کی سینکڑوں طالبات رضاکارانہ خدمات سرانجام دے رہی ہیں۔اب ان رضاکاران کو مختلف گروپس میں تقسیم کردیا گیا ہے جو الخدمت کے مختلف پروگرامات میں اپنی اپنی خدمات سرانجام دیں گی۔تمام نوجوان نسل کو چاہیئے کہ وہ خدمت خلق کے کاموں میں بڑھ چڑھ کراپنا کردار ادا کریں۔
1

ایگزیکٹو ڈائریکٹر الخدمت فاؤنڈیشن شاہد اقبال نے سیکرٹری جنرل یونیو علی کرت سے ملاقات کی

انقرہ: ایگزیکٹو ڈائریکٹر الخدمت فاؤنڈیشن شاہد اقبال نے اپنے دورہ ترکی کے دوران یونین آف این جی اوز آف دی اسلامک ورلڈ کے مرکزی دفتر کا دورہ کیا اور سیکرٹری جنرل یونیو علی کرت سے ملاقات کی۔ ملاقات میں دو طرفہ باہمی امور زیرِ بحث آئے۔ اس کے علاوہ شورش زدہ علاقوں میں اسلامی ممالک کی رفاعی تنظیموں کے کردار کو فعال کرنے اور ریلیف سرگرمیوں کو مزید علاقوں تک پھیلانے پر بھی بھی تبادلہ خیال کیا گیا۔
2

الخدمت فاؤنڈیشن کے تحت ملک بھر میں عالمی یومِ آب منایا گیا

لاہور: دنیا بھر میں 22 مارچ پانی کے عالمی دن کے طور پر منایا جاتا ہے ۔جس کا مقصددنیا کو آلودہ پانی سے ہونے والی بیماریوں ، نقصانات اور صاف پانی کی اہمیت کے حوالے سے آگاہی دینا ہے۔ اسی سلسلے میں الخدمت فاؤنڈیشن پاکستان نے بھی پانی کے عالمی دن کو بھر پورانداز میں منانے کا فیصلہ کیا۔الخدمت فاؤنڈیشن کے تحت 22 مارچ کو’’صاف پانی ۔۔۔ محفوظ زندگی‘‘ کے عنوان کے تحت ملک بھر میں سیمینارز،آگاہی واک اور تصویری نمائش کا اہتمام کیا گیا۔لاہور میں اس حوالے سے ملتان چونگی تا ہاتھی چوک خصوصی آگاہی واک کا انعقاد کیا گیا جس میں الخدمت کے ذمہ داران اور سکول کے سینکڑوں بچوں سمیت معززینِ علاقہ کی کثیر تعداد نے شرکت کی۔نیشنل ڈائریکٹرصاف پانی پروگرام الخدمت فاؤنڈیشن پاکستان سید راشد داؤد نے اس موقع پرکہا کہ یہ دن منانے کا مقصد عوام الناس میں پینے کے صاف پانی کی اہمیت اور اسے محفوظ بنانے کے حوالے سے شعور اجاگر کرنا ہے۔پانی کی قلت،آلودہ پانی اور اُس سے ہونے والے نقصانات کے پیشِ نظر الخدمت فاؤنڈیشن ملک بھر میں آگہی مہم کے ساتھ ساتھ شہروں اور دور دراز پسماندہ علاقوں میں صاف پانی کے منصوبوں پربھی کام کر رہی ہے جس کا مقصد عوام الناس کو گھروں کے قریب پینے کے صاف پانی کی سہولت فراہم کرنا ہے۔الخدمت فاؤنڈیشن شہری علاقوں میں جدید واٹر فلٹریشن پلانٹ کی تنصیب ، تھر پارکر، اندرون سندھ ، بلوچستان، پنجاب اور خیبر پختونخوا کے دور دراز اور پسماندہ علاقوں میں کنویں کھدوانے اور کمیونٹی ہینڈ پمپ لگانے کا کام ، آزاد کشمیر اور خیبر پختونخوا میں’’ گریوٹی فلو واٹر سکیم‘‘ اور بلوچستان میں کاریز کے ذریعے بھی پینے کا صاف پانی فراہم کررہی ہے۔ اس وقت الخدمت کے تحت ملک بھر میں 97 واٹر فلٹریشن پلانٹ،1697 کنویں ،4849 ہینڈ پمپ،517سب مرسبل واٹر پمپ،118 گریوٹی فلو واٹر سکیم اور504دیگر منصوبہ جات کام کر رہے ہیں اور اِن صاف پانی کے منصوبوں سے روزانہ قریباََ18 لاکھ افراد مستفید ہوتے ہیں۔
4

ماس میڈیا ان نان پرافٹس” کے عنوان سے کراچی میں ورکشاپ کا انعقاد کیا گیا”

کراچی: الخدمت فاؤنڈیشن کے میڈیا اینڈ مارکیٹنگ ڈیپارٹمنٹ کے زیرِ اہتمام “ماس میڈیا ان نان پرافٹس” کے عنوان سے ورکشاپ کا انعقاد کیا گیا۔ ورکشاپ کی قیادت جنرل مینجر میڈیا اینڈ مارکیٹنگ ڈیپارٹمنٹ الخدمت فاؤنڈیشن پاکستان محمد عمیر ادریس نے کی۔ اس موقع پر سی ای او پلس کاشف حفیظ نے شرکا کو کسی بھی این جی او میں فنڈ ریزنگ کمپین اور اپنے پیغام کو زیادہ سے زیادہ لوگوں تک پہنچانے کے حوالے سے سوشل میڈیا نیٹ ورکس اور ویب سائٹس کی اہمیت سے آگاہ کیا۔
عمیر ادریس نے این جی اوز میں پروموشنل اور موٹیویشنل مواد کی تیاری میں کری ایٹو آرٹ ورک کی اہمیت پر روشنی ڈالی۔ اسسٹنٹ پروفیسر کراچی یونیورسٹی ڈاکٹر اسامہ شفیق نے شرکا کو میڈیا ریلیشنز اور پبلک ریلیشنز کی اہمیت سے آگاہ کیا۔ انھوں نے اس بات پر زور دیا کہ اپنے کاموں کو عوام الناس تک پہنچانے کے لئے میڈیا پرسنز کے ساتھ خوشگوار تعلقات قائم کرنا اہم ضرورت وقت ہے۔
3

الخدمت ڈیزاسٹر مینجمنٹ پروگرام کا ششماہی اجلاس پشاور میں منعقد ہوا

پشاور: الخدمت فاؤنڈیشن ڈیزاسٹر مینجمٹ پروگرام کے ششماہی اجلاس کا انعقاد پشاور میں کیا گیا۔ اجلاس میں تمام بورڈ ممبران نے شرکت کی جبکہ صدارت صدر الخدمت خیبر پختونخوا خالد وقاص نے کی۔ اس موقع پر ڈیزاسٹر مینجمنٹ پروگرام کی کارکردگی کا جائزہ لیا گیا۔ اجلاس میں فیصلہ کیا گیا کہ ناگہانی صورتحال میں الخدمت رضاکاران کی کارکردگی کو مزید بہتر بنانے کے لئے سال 2018میں ایک سو سے زاید تربیتی ورکشاپس کا انعقاد کیا جائے گا۔
5

الخدمت فاؤنڈیشن کے کفالت یتامیٰ پروگرام کے تحت چارسدہ میں آغوش ہوم تعمیر کیا جائے گا

چارسدہ: الخدمت فاؤنڈیشن کے کفالت یتامیٰ پروگرام کے تحت چارسدہ میں آغوش ہوم تعمیر کیا جائے گا۔ مقامی یتیم اور بے سہارا بچوں کو تعلیم و تربیت، خوراک، صحت اور ذہنی و جسمانی نشوونما کے معیاری مواقعے فراہم کرنے کے لئے تعمیر کئے جانے والی آغوش ہوم پر تقریباََ 190 ملین روپے لاگت آئے گی۔ منصوبے سے متعلق مزید معلومات بعد ازاں شیئر کی جائیں گی۔
6

پشاور میں نے نئے الخدمت چائلڈ پروٹیکشن سنٹر کا افتتاح کردیا گیا

پشاور: الخدمت فاؤنڈیشن کے ایجوکیشن پروگرام کے تحت چائلڈ پروٹیکشن سنٹر اینڈ ری ہیبلی ٹیشن ٹرسٹ کے تعاون سے پشاور میں نئے الخدمت چائلڈ پروٹیکشن سنٹر کا افتتاح کردیا گیا۔ ضلع ناظم پشاور ارباب محمد عاصم نے سنٹر کا افتتاح کیا جبکہ صدر الخدمت خیبرپختونخوا خالد وقاص اور سی پی آر ٹی کے بانی ڈاکٹر الطاف قادر خٹک بھی موقع پر موجود تھے۔
7

رائیونڈ بم دھماکے کے فوری بعد الخدمت رضاکاران نے امدادی سرگرمیاں سرانجام دیں

لاہور: گذشتہ روز رائیونڈ کے قریب بم دھماکے کے فوری بعد الخدمت کی امدادی ٹیم موقع پر پہنچی اور امدادی سرگرمیاں سرانجام دیں۔ 3 ایمبولینسوں کے ذریعے لاشوں اور زخمیوں کو شریف میڈیکل کمپلیکس اور جناح ہسپتال منتقل کیا گیا۔ الخدمت فاؤنڈیشن کے 12 رضاکاران نے اس ریلیف آپریشن میں حصہ لیا۔
8

شامی اور روہنگیا مہاجرین کے لئے الخدمت فاؤنڈیشن کی امدادی سرگرمیاں جاری ہیں

لاہور: الخدمت فاؤنڈیشن کی شامی مہاجرین کے لئے جاری امدادی سرگرمیوں کے سلسلے کو مزید آگے بڑھاتے ہوئے ترکی کی رفاعی تنظیم حیرات فاؤنڈیشن کے تعاون سے امدادی سامان کی نئی کھیپ شامی مہاجرین تک پہنچا دی گئی۔ ممبر نیشنل اسمبلی عائشہ سید نے شامی خاندانوں میں امدادی سامان تقسیم کیا۔
اسی طرح بنگلہ دیش میں مقیم روہنگیا مہاجرین کے لئے بھی امدادی سرگرمیاں جاری ہیں۔ اس حوالے سے حال میں روہنگیا بچوں کی تعلیم اور خوراک کے لئے چائلڈ ہوم کا قیام، صاف پانی کی فراہمی کے لئے ہینڈ پمپس کی تنصیب اور فری میڈیکل کیمپس کا اہتمام کیا گیا ہے۔ یہ سرگرمیاں کوہاٹین ایلومنائی ایسوسی ایشن آف کیڈٹ کالج کوہاٹ کے تعاون سے سرانجام دی گئیں۔