2

الخدمت فاؤنڈیشن کے تحت ملک بھر میں عالمی یومِ آب منایا گیا

لاہور: دنیا بھر میں 22 مارچ پانی کے عالمی دن کے طور پر منایا جاتا ہے ۔جس کا مقصددنیا کو آلودہ پانی سے ہونے والی بیماریوں ، نقصانات اور صاف پانی کی اہمیت کے حوالے سے آگاہی دینا ہے۔ اسی سلسلے میں الخدمت فاؤنڈیشن پاکستان نے بھی پانی کے عالمی دن کو بھر پورانداز میں منانے کا فیصلہ کیا۔الخدمت فاؤنڈیشن کے تحت 22 مارچ کو’’صاف پانی ۔۔۔ محفوظ زندگی‘‘ کے عنوان کے تحت ملک بھر میں سیمینارز،آگاہی واک اور تصویری نمائش کا اہتمام کیا گیا۔لاہور میں اس حوالے سے ملتان چونگی تا ہاتھی چوک خصوصی آگاہی واک کا انعقاد کیا گیا جس میں الخدمت کے ذمہ داران اور سکول کے سینکڑوں بچوں سمیت معززینِ علاقہ کی کثیر تعداد نے شرکت کی۔نیشنل ڈائریکٹرصاف پانی پروگرام الخدمت فاؤنڈیشن پاکستان سید راشد داؤد نے اس موقع پرکہا کہ یہ دن منانے کا مقصد عوام الناس میں پینے کے صاف پانی کی اہمیت اور اسے محفوظ بنانے کے حوالے سے شعور اجاگر کرنا ہے۔پانی کی قلت،آلودہ پانی اور اُس سے ہونے والے نقصانات کے پیشِ نظر الخدمت فاؤنڈیشن ملک بھر میں آگہی مہم کے ساتھ ساتھ شہروں اور دور دراز پسماندہ علاقوں میں صاف پانی کے منصوبوں پربھی کام کر رہی ہے جس کا مقصد عوام الناس کو گھروں کے قریب پینے کے صاف پانی کی سہولت فراہم کرنا ہے۔الخدمت فاؤنڈیشن شہری علاقوں میں جدید واٹر فلٹریشن پلانٹ کی تنصیب ، تھر پارکر، اندرون سندھ ، بلوچستان، پنجاب اور خیبر پختونخوا کے دور دراز اور پسماندہ علاقوں میں کنویں کھدوانے اور کمیونٹی ہینڈ پمپ لگانے کا کام ، آزاد کشمیر اور خیبر پختونخوا میں’’ گریوٹی فلو واٹر سکیم‘‘ اور بلوچستان میں کاریز کے ذریعے بھی پینے کا صاف پانی فراہم کررہی ہے۔ اس وقت الخدمت کے تحت ملک بھر میں 97 واٹر فلٹریشن پلانٹ،1697 کنویں ،4849 ہینڈ پمپ،517سب مرسبل واٹر پمپ،118 گریوٹی فلو واٹر سکیم اور504دیگر منصوبہ جات کام کر رہے ہیں اور اِن صاف پانی کے منصوبوں سے روزانہ قریباََ18 لاکھ افراد مستفید ہوتے ہیں۔
12

الخدمت فاؤنڈیشن کے کفالت یتامیٰ پروگرام کے تحت پیشنٹ بینوولنٹ سوسائٹی شیخ زید ہسپتال کے تعاون سے شیخ زید میڈیکل کمپلیکس میں یتیم بچوں کے لئے فری میڈیکل کیمپ کاانعقادکیا گیا

الخدمت فاؤنڈیشن کے کفالت یتامیٰ پروگرام کے تحت پیشنٹ بینوولنٹ سوسائٹی شیخ زید ہسپتال کے تعاون سے شیخ زید میڈیکل کمپلیکس میںیتیم بچوں کے لئے فری میڈیکل کیمپ کاانعقادکیا گیا۔ جس میں الخدمت آرفن کیئر پروگرام کے تحت رجسٹرڈ 1ہزار یتیم بچوں اور ان کی ماؤں کا مکمل میڈیکل چیک اپ کیا گیااور ادویات فراہم کی گئیں۔میڈیکل کیمپ میں نیشنل ڈائریکٹر آرفن فیملی سپورٹ پروگرام بریگیڈیئر (ر)عبدالجبار بٹ،سینئر مینجر الخدمت آرفن فیملی سپورٹ پروگرام یاسر الطاف،چیئرپرسن پیشنٹ بینولنٹ سوسائٹی پروفیسر ڈاکٹر سعدیہ شہزاد،ہیڈ آف ڈیزاسٹر مینجمنٹ پیشنٹ بینولنٹ سوسائٹی پروفیسر ڈاکٹر عائشہ ہمایوں، صدرپیشنٹ بینولنٹ سوسائٹی ڈاکٹر شاہد اقبال،ڈاکٹر راؤ اویس اختر، حسن ریاض،ڈاکٹر وقاص احمد، ڈاکٹر مہر حمزہ، ڈاکٹر بلال گجر ،25سینئر ڈاکٹرز سمیت 120ڈاکٹرز،پیرامیڈیکل اسٹاف اور الخدمت رضاکاران نے خدمات سرانجام دیں۔ اس کے علاوہ مختلف شعبہ زندگی سے تعلق رکھنے والی نامور شخصیات نے بھی کیمپ کا دورہ کیا۔ کیمپ میں بچوں کی تفریح کے لئے فیس پینٹنگ،مہندی، ٹیبلوز ،پپٹ شواور جھولوں کے علاوہ بچوں اور ان کے سرپرستوں کے لئے کھانے کا بھی خصوصی انتظام کیا گیاتھا۔بریگیڈیئر (ر)عبدالجبار بٹ نے اس موقع پر کہا کہ الخدمت فاؤنڈیشن آرفن کیئر پروگرام کے تحت ملک بھر کے 10 ہزار سے زائد یتیم بچوں کو تعلیم،خوراک ،تربیت اور ذہنی و جسمانی نشوونما کے بہترین مواقعے فراہم کرنے کے ساتھ ساتھ ان کی صحت کا بھی خصوصی خیال رکھا جاتا ہے۔ اس مقصد کے لئے سال میں دو مرتبہ خصوصی میڈیکل کیمپس لگائے جاتے ہیں جن میں ان کا مکمل مفت طبی معائنہ کیا جاتا ہے اور ادویات فراہم کی جاتی ہیں۔پروفیسر ڈاکٹر سعدیہ شہزاد نے کہا کہ پیشنٹ بینولنٹ سوسائٹی اپنے تمام تر وسائل کو پروئے کار لاتے ہوئے ان یتیم بچوں کے لئے الخدمت کے ساتھ میدان عمل میں کوشاں ہے۔ یہی وجہ ہے کہ ہم آج1ہزار یتیم بچوں کے لئے تیسرا عظیم الشان میڈیکل کیمپ لگانے میں کامیاب ہوئے ہیں۔ان کیمپس کے ذریعے بچوں کی مکمل ہیلتھ سکریننگ کی جاتی ہے تاکہ کسی بھی بیماری کی صورت میں انھیں مکمل طبی سہولیات فراہم کی جاسکیں۔
web temp 72dp

الخدمت فاؤنڈیشن وومن ونگ ٹرسٹ کے زیرِ اہتمام یتیم بچیوں کے اقامتی ادارے آغوش الخدمت شیخوپورہ کی تعمیر کے لئے ڈیفنس میں چیریٹی فیئر کا انعقاد کیا گیا۔

الخدمت فاؤنڈیشن وومن ونگ ٹرسٹ کے زیرِ اہتمام یتیم بچیوں کے اقامتی ادارے آغوش الخدمت شیخوپورہ کی تعمیر کے لئے ڈیفنس میں چیریٹی فیئر کا انعقاد کیا گیا۔چیریٹی فیئر کی رنگا رنگ تقریب ڈیفنس میں لاہور بھر کے مختلف سکولوں کے سینکڑوں بچوں نے اپنی فیمیلیز کے ہمراہ شرکت کی۔الخدمت فاؤنڈیشن کے صدر محمد عبدالشکور نے چیریٹی فیئر کا افتتاح کیا جبکہ وومن ونگ ٹرسٹ لاہور کی صدر صائمہ شبیر،فنانس سیکرٹری شیریں ارشد،صدر وومن ونگ فیصل آباد ثمینہ پرویز، انچارج سٹارز آف اسلام آمنہ خرم بھی موقع پر موجود تھیں۔اس موقع پر بچوں کے لئے فوڈ اسٹالز، کھیلوں ، پپٹ شو، میجک شو اور بہت سی دوسری تفریحی سرگرمیوں کا اہتمام کیا گیا تھا جن سے بچے بے حد محظوظ ہوئے۔ محمد عبدالشکور نے اس موقع پر کہاکہ الخدمت وومن ونگ ٹرسٹ نے یتیم بچیوں کے آغوش ہوم کے لئے ایک شاندار تقریب سجائی ہے اوربچوں کی تفریح کے لئے ایک بہترین موقع فراہم کیا ہے۔ ایسی تقریبات کے انعقاد سے ہمارے معاشرے میں ایک طرف جہاں صحت مند سرگرمیوں کو فروغ ملے گا تو دوسری بچوں میں خدمت خلق کا جذبہ بھی پروان چڑھے گا۔ آغوش شیخوپورہ فار گرلز میں 256 یتیم بچیوں کی گنجائش ہوگی جہاں ان کوقیام و طعام، صحت و تعلیم اور ذہنی و جسمانی نشوونما کے لئے سازگار ماحول فراہم کیا جائے گا۔
6

تلہ گنگ میں ایمان ہسپتال کی افتتاحی تقریب اور ڈونر کانفرنس کا انعقاد کیا گیا

الخدمت فاؤنڈیشن کے تحت تلہ گنگ میں ایمان ہسپتال کا افتتاح کردیا گیا اس کے ساتھ ہی ڈونر کانفرنس کا انعقاد بھی کیا گیا۔ تقریب کے مہمان خصوصی الخدمت فاؤنڈیشن کے سیکرٹری جنرل ڈاکٹر مشتاق احمد مانگٹ تھے جبکہ معززین علاقہ کی کثیر تعداد بھی موقع پر موجود تھی۔ تقریب کی میزبانی کے فرائض شعیب احمد ہاشمی نے سرانجام دیئے۔
web temp 72dp

الخدمت فاؤنڈیشن کے رضا کار پروگرام کے تحت معاشرے اور خصوصاًنوجوانوں میں رضاکارانہ خدمات کے جذبے کے فروغ کے لئے’’ دوسری الخدمت یوتھ گیدرنگ ‘‘کا انعقاد کیا گیا

الخدمت فاؤنڈیشن کے رضا کار پروگرام کے تحت معاشرے اور خصوصاًنوجوانوں میں رضاکارانہ خدمات کے جذبے کے فروغ کے لئے’’ دوسری الخدمت یوتھ گیدرنگ ‘‘کا انعقاد کیا گیا جس میں ملک بھر سے 40سے زائد یونیورسٹیوں کے ہزاروں طلباء و طالبات نے شرکت کی ۔تقریب کے مہمانان خصوصی سینئر وزیر خیبر پختونخوااسمبلی اور ممبر نیشنل اسمبلی عائشہ سیّد تھیں۔ اس کے علاوہ صدر الخدمت فاؤنڈیشن محمد عبدالشکور ، سینئر نائب صدر سید احسان اللہ وقاص ، سیکرٹری جنرل ڈاکٹر مشتاق احمد مانگٹ، الخدمت وومن ونگ سے کلثوم رانجھاسمیت ڈاکٹر امجد ثاقب ، ڈاکٹر حفیظ الرحمان ،فاروق چوہان، سلمان گیلانی اور دیگر نے شرکت کی جبکہ میزبانی کے فرائض میڈیا ریلیشنز ڈیپارٹمنٹ سے شعیب احمد ہاشمی نے سر انجام دیئے۔ تقریب سے خطاب کرتے ہوئے عنایت اللہ خان نے کہا کہ نوجوان ہمارا مستقبل اور ہماری اُمید ہیں، الخدمت یوتھ گیدرنگ جیسی تقریبات کے انعقاد سے نوجوانوں کو اپنی زندگی کا حقیقی مقصد سمجھنے کا موقع ملے گا۔ الخدمت فاؤنڈیشن نے نوجوانوں کو رضاکارانہ خدمات کے جذنے کے فروغ اور انکی انجام دہی کے لیے ایک بہترین پلیٹ فارم مہیا کیا ہے۔ نامور سپیکر قاسم علی شاہ نے اس موقع پر رضاکارانہ سرگرمیوں کی اہمیت اور اس میں نوجوانوں کے کردار پر خصوصی لیکچر دیا جبکہ دیگر مقررین نے بھی شرکاء سے خطاب کیا ۔ اس کے علاوہ ملک بھر میں خدمت خلق کے شعبہ میں گراں قدر خدمات سرانجام دینے والے خواتین و حضرات مسز رخسانہ اظہار ،ڈاکٹر شیر زمان، ڈاکٹر غلام قادر فیاض اور شمشاد علی کو خصوصی طور پر مدعو کیا گیا تھاجنہوں نے طلباء و طالبات کے ساتھ اپنے خیالات کا اظہار کیا۔ تقریب میں بیٹھک سکول کے بچوں نے سانحہ اے پی ایس کے حوالے سے خصوصی ٹیبلو پیش کیا ۔ مختلف سیاسی و سماجی شخصیات ، میڈیا نمائندگان، یوتھ سوسائیٹیزسمیت ہر شعبہ ہائے زندگی سے تعلق رکھنے والے افراد کی بڑی تعداد بھی موقع پر موجود تھی۔دوسری الخدمت یوتھ گیدرنگ میں خدمت خلق کے میدان میں کارہائے نمایاں سرانجام دینے والے شخصیات کے لیے نعمت اللہ خان ایوارڈ بھی متعارف کروایا گیا جس کے حقدار ڈاکٹر امجد ثاقب اور ڈاکٹر حفیظ الرحمان قرار پائے۔ تقریب میں مہمانان کو شیلڈز جبکہ شرکاء کو سوال و جواب سیشن میں انعامات دیئے گئے۔ تقریب کے اختتام پر رضاکارانہ سرگرمیوں کے فروغ کے لیے آسمان پر رنگ برنگی قندیلیں بھی چھوڑی گئیں۔
1D6A8990

الخدمت فاؤنڈیشن لاہور کے تحت الخدمت سکولزسے امتحانات میں بہترین کارکردگی کا مظاہرہ کرنے والے ہونہار طلبہ کی حوصلہ افزائی کے لئے تقریب تقسیم انعامات کا انعقاد کیا گیا

الخدمت فاؤنڈیشن لاہور کے تحت الخدمت سکولزسے امتحانات میں بہترین کارکردگی کا مظاہرہ کرنے والے ہونہار طلبہ کی حوصلہ افزائی کے لئے تقریب تقسیم انعامات کا انعقاد کیا گیا ۔تقریب کی صدارت الخدمت فاؤ نڈیشن پاکستان کے صدر محمدعبدالشکور نے کی جبکہ جماعت اسلامی پاکستان کے جنرل سیکرٹری لیاقت بلوچ اورنامور کرکٹر مشتاق احمدمہمانانِ خصوصی تھے۔ دیگر مہمانان میں جماعت اسلامی لاہور کے امیر ذکر اللہ مجاہد،الخدمت لاہور کے صدر عبدالعزیز عابداورفاروق چوہان شامل تھے۔تقریب سے خطاب کرتے ہوئے لیاقت بلوچ نے کہا کہ طلبہ ہمارا قیمتی اثاثہ ہیں اور ان کی تعلیم و تربیت اور کردار سازی ہماری اولین ترجیح ہونی چاہیئے تاکہ یہ بچے یہ معاشرے کا فعال حصہ بن سکیں ،اس حوالے سے الخدمت بھرپور کردار ادا کررہی ہے ۔محمد عبدالشکور نے کہا کہ الخدمت ملک بھر میں ڈیزاسٹر مینجمنٹ، کفالتِ یتامیٰ، صحت عامہ، صاف پانی کی فراہمی، مواخات پروگرام اور دیگر سماجی خدمات کے ساتھ ساتھ ہر خاص و عام تک سستی اور معیاری تعلیم کی فراہمی کے لئے اپنی کاوشیں جاری رکھے ہوئے ہے۔ ملک بھر میں الخدمت کے تحت چلنے والے 60سکولوں میں 12ہزار سے زائد بچے تعلیم حاصل کررہے ہیں جن کو پلے گروپ سے میٹرک تک تعلیم دی جارہی ہے جبکہصرف لاہور میں ہی 4الخدمت سکولز ہیں جن میں3500 سے زائد طلبہ و طالبات زیرِ تعلیم ہیں ۔ذکر اللہ مجاہد نے کہا کہ تعلیم ہر بچے کا بنیادی حق ہے اور ارض پاکستان کو علم کا گہوارا بنا کر ہی ترقی کی راہ پر گامزن کیا جا سکتا ہے ۔اس موقع پر بچوں نے قومی نغموں پر خوبصورت ٹیبلوز پیش کئے جبکہ اختتام پر طلبہ اور اُن کے اساتذہ کو یادگاری شیلڈز اور تعریفی اسناد بھی پیش کی گئیں ۔تقریب میں الخدمت سکولزلاہور کے ثریا اشفاق، خورشید،لال اور فضل نور کیمپسزکے طلبہ و طالبات، ان کے اساتذہ و والدین سمیت مختلف شعبہ ہائے زندگی سے تعلق رکھنے والے افراد کی بھی کثیر تعداد نے شرکت کی جبکہ میزبانی کے فرائض عنبرین صلاح الدین نے سرانجام دیئے۔
22449707_1336147216508747_2306393870587863414_n

الخدمت فاؤنڈیشن کے تحت کوہاٹ میں الخدمت نسیم میموریل ہسپتال کا افتتاح کردیا گیا

الخدمت فاؤنڈیشن کے تحت کوہاٹ میں الخدمت نسیم میموریل ہسپتال کا افتتاح کردیا گیا۔ اس حوالے سے منعقدہ تقریب میں الخدمت فاؤنڈیشن کے سیکرٹری جنرل ڈاکٹر مشتاق احمد مانگٹ اور مقامی ذمہ داران سمیت مختلف شعبہ ہائے زندگی سے تعلق رکھنے والے افراد کی کثیر تعداد نے شرکت کی۔ او۔پی۔ڈی، آؤٹ ڈور سروسز، گائنی، ویکسی نیشن، الٹرا ساؤنڈ، لیب اور فارمیسی جیسی سہولیات سے آراستہ اس ہسپتال میں مستحق اور غریب افراد کو مفت علاج معالجے کی سہولیات مہیا کی جائیں گی۔
1

الخدمت فاؤنڈیشن کے تحت اٹک میں چیریٹی ڈنر کا انعقاد کیا گیا

اٹک: الخدمت فاؤنڈیشن کے تحت اٹک میڈی کل سنٹر کے لئے چیریٹی ڈنر کا انعقاد کیا گیا۔ الخدمت فاؤنڈیشن کے سیکرٹری جنرل ڈاکٹر مشتاق احمد مانگٹ، الخدمت پنجاب کے صدر راؤ محمد ظفر اور معروف کالم نگار اوریا مقبول جان تقریب کے مہمان خصوصی تھے جبکہ میزبانی کے فرائض شعیب احمد ہاشمی نے سرانجام دیئے۔ اس چیریٹی ڈنر میں 12 لاکھ روپے سے زائد کے فنڈز جمع ہوئے۔
webSri

الخدمت فاؤنڈیشن کے رضاکارپروگرام اور مختلف یوتھ سوسائیٹیز کے باہمی اشتراک سے ٹاؤن شپ میں افطار ڈنر کا اہتمام،سینکڑوںیتیم بچوں اور اولڈ ایج ہومز میں رہنے والے معمر افراد میں کپڑے اور عید کے تحائف تقسیم کئے گئے

لاہور: الخدمت فاؤنڈیشن کے رضاکارپروگرام اور مختلف یوتھ سوسائیٹیز کے اشتراک سے ٹاؤن شپ میں افطار ڈنر کا اہتمام کیا گیا جس میں یتیم بچوں، اولڈ ایج ہومز میں رہنے والے معمر افراد،الخدمت کے ذمہ داران اور مختلف یونیورسٹیز کی یوتھ سوسائیٹیزکے ممبران کی کثیر تعداد نے شرکت کی۔تقریب کے مہمانِ خصوصی الخدمت فاؤنڈیشن کے صدر محمد عبدالشکور تھے جبکہ ہیلے کالج آف کامرس کے پرنسپل ڈاکٹر حسن مبین عالم، شیخ زید ہسپتال کی فیکلٹی ایڈوائزر ڈاکٹر سعدیہ شہزاد عالم، کم عمر ترین مائیکروسافٹ سرٹیفائیڈ حزیر اعوان نے بھی خصوصی طور پر شریک ہوئے۔تقریب سے خطاب کرتے ہوئے محمد عبدالشکور نے کہا کہ یتیم بچے اوریہ بے گھر بزرگ افراد ہمارے معاشرے کا سب سے توجہ طلب طبقہ ہیں۔ان کو بوجھ سمجھنا اور حالات کے رحم و کرم پر چھوڑ دینا کوئی بھی معاشرہ اس کی اجازت نہیں دیتا۔الخدمت فاؤنڈیشن ہمیشہ سے اس محروم طبقے کی کفالت اور فلاح و بہبود کا جذبہ لئے میدان عمل میں کوشاں رہی ہے۔ایسی تقریبات کا مقصد ان کو رمضان المبارک اور عید کی خوشیوں میں اپنے ساتھ شامل کرنا ہے۔انھوں نے کہا کہ الخدمت فاؤنڈیشن نوجوانوں کے لئے ایک بڑا پلیٹ فارم ہے اور آج مختلف یوتھ سوسائیٹیز کاالخدمت کے ساتھ ملکر اس رنگا رنگ تقریب کا انعقاد اس بات کا ثبوت ہے ہمارے نوجوان خدمت خلق کے کاموں میں دلچسپی لے رہے ہیں۔ تقریب کے اختتام پریتیم بچوں اور اولڈ ایج ہومز میں رہنے والے بزرگ افراد میں عیدی، کپڑے اور دیگر تحائف تقسیم کئے گئے۔جبکہ آسمانی لالٹینیں بھی ہوا میں چھوڑی گئیں۔
3

الخدمت فاؤنڈیشن کے تحت گوجرہ میں ڈونر کانفرنس کا انعقاد، 2.1 ملین روپے کے فنڈز اکٹھے کرلئے گئے

گوجرہ: الخدمت فاؤنڈیش کے کفالتِ یتامیٰ پروگرام کے تحت گوجرہ میں ڈونر کانفرنس کا انعقاد کیا گیا جس میں سماجی و کاروباری شخصیات سمیت معززین علاقہ کی کثیر تعداد نے شرکت کی۔ اس ڈؤنر کانفرنس سے 2.1 ملین روپے کے فنڈز جمع کرلئے گئے۔
تقریب کی صدارت الخدمت فاؤنڈیشن کے اسسٹنٹ سیکرٹری جنرل احمد جمیل راشد نے کی جبکہ الخدمت پنجاب کے نائب صدر میاں وقاص وحید بھی موقع پر موجود تھے۔ احمد جمیل راشد نے الخدمت کے ساتوں پروگرامات کا ایک تفصیلی خاکہ حاضرین کے سامنے پیش کیا۔ جبکہ شرکا اور مہمانان میں سوینئر بھی پیش کی گئیں۔
الخدمت فنڈ ریزنگ کمپین 2017 کے سلسلے میں ملک بھر میں ڈونر کانفرنسز کا انعقاد کیا جارہا ہے جس کا مقصد الخدمت کے ملک بھر مین جاری کفالتِ یتامیٰ پروگرام کے لئے فنڈز اکٹھے کرنا ہے۔ واضح رہے کہ اس وقت الخدمت فاؤنڈیشن ملک بھر کے 7200 سے زائد یتیم اور بے سہارا بچوں کی ان کے گھروں اور آغوش سنٹرز میں کفالت کررہی ہے۔